Литература сылын көрсө Литература уонна Театр үлэһиттэрин манифестара
1. Театр уонна Литература норуот туһугар үлэлиэхтээхтэр диибит биһиги — театр артыыстара, режиссердар, худуоһунньуктар, музыканнар, суруйааччылар уонна драматурдар.
 
 2. Дьон дууһатын, кутун-сүрүн оонньуутун уус-ураннык көрдөрүү, чинчийии Театр уонна Литература сүрүн соруга диэн билинэбит, биһиги.
 
3. Автор, дьон-норуот дьылҕатын туһугар ыалдьара, охсуһара чуолкай көстөр уонна биллэр драматическай айымньыны суруйбут эрэ буоллаҕына биһиги айымньынан билинэбит.
 
4. Төрөөбүт төрүт тыл баайын, сүмэтин иҥэриммит, төрөөбүт төрүт тылынан саҥа-иҥэ эрэ автор уонна артыыс өйдөрүн-санааларын күүһүн бииргэ ситимниир диэн этэбит.
 
5. Саха сирин литератордара уонна театрдарын үлэһиттэрэ тэбис-тэҥ бырааптаах буолалларын, бэйэ бэйэлэрин элбэх өрүттээх айымньыларын уонна култуураларын убаастаһар, араас кыһалҕаларын эйэ-дэмнээх кэпсэтии көмөтүнэн быһаарсан бииргэ үлэлээһиннэрин тэрийиэх тустаахпыт.
 
6. Биһиги Саха сирин бырааттыы омуктарын тылларын уонна литератураларын традицияларын (үгэстэрин) убаастыыбыт, харыстыыбыт уонна салгыы сайыннарарга кыһанабыт.
 
7. Аныгы общество ирдэбиллэрин уонна литература музейа театры кытта ыкса ситимин учуоттаан туран литература сайдар саҥа хайысхаларын мэлдьи айымньылаахтык көрдүү, була сатыыбыт.
 
8. Улахан болҕомтону идэбит, үөрэхпит, сайдыыбыт таһымын үрдэтэргэ уурарбыт быһыытынан, А.А. Бахрушин аатынан Государство театрдарын Киин музейын уонна Россия суруйааччыларын сойууһун кытта ыкса ситими тутабыт.
 
9. Бэйэбит биир идэлээхтэрбит, биир санаалаахтарбыт айымньыларын тэнитэр, тарҕатар, дьоҥҥо тириэрдэр, көрдөрөр сыалтан араас фестиваллары, конференциялары ыытыах, хомуруунньуктары, тылбаастары элбэхтик таһаартарыах, радио, телевидение, бэчээт көмөлөрүн туһаныах кэриҥнээхпит.
 
10. Биһиги, Саха сирин уонна Арктика бары норуоттарын ураты, дьикти, айыы тыыннаах култуураларын Саха Республикатын иһигэр эрэ буолбакка, бүтүн Аан дойду сайдыылаах дойдуларыгар барытыгар дьоһуннаахтык билиһиннэрэргэ дьулуһабыт.

Литературные сайты:

 

Литературные музеи: